Informazioa:
Lurra Eguzkitikako hirugarren planeta da, eguzki-sistemako dentsoena eta bizia duen argizagi ezagun bakarra. Satelite natural bat du, Ilargia. Lurreko biodibertsitate milioika urtetan garatu da, era jarraituan hedatuz iraungipen masiboetan izan ezik[25]. Bertan 8 milioi espezie baino gehiango bizi dira[26]. Bertan 7.200 milioi gizaki bizi dira, haren biosferaren eta mineralen mende daudenak.
Lurraren litosfera hainbat atal zurrunetan banatua dago, plaka tektoniko izenekoak, gainazalean zehar higitzen direnak milioika urtetan. Lurraren gainazalaren %71 urez estalita dago. Beste guztia kontinente eta uharteak dira, bertako aintzira eta ur-ibilguak kontutan hartuta. Lurburuak gehienbat izotzez daude estaliak, itsas-izotzak eta Antartikako izotz-geruza barne. Lurraren barnea oraindik ere aktibo dago, burdinazko barne-nukleo solidoarekin, eremu magnetikoa eragiten duen kanpo-nukleo likidoarekin eta mantu osatzen duen geruza lodi eta nahiko solidoarekin.
